काठमाडौं । युरोपका विभिन्न देशमा फैलिएको असाधारण गर्मी लहरले जनजीवन, स्वास्थ्य सेवा, यातायात र ऊर्जा क्षेत्रमा गम्भीर प्रभाव पार्न थालेको छ। वैज्ञानिकहरूले यसलाई जलवायु परिवर्तनको प्रत्यक्ष असरका रूपमा व्याख्या गर्दै भविष्यमा यस्ता गर्मीका छालहरू अझ तीव्र र बारम्बार दोहोरिने चेतावनी दिएका छन्।
फ्रान्समा अत्यधिक गर्मीका कारण डुबेर मृत्यु हुने घटनामा वृद्धि भएको छ। खेलकुद तथा युवा मन्त्रालयका अनुसार सप्ताहन्तयता करिब २० जनाले ज्यान गुमाएका छन्। सरकारले नागरिकलाई नदी, ताल र अन्य जलाशयमा विशेष सावधानी अपनाउन आग्रह गरेको छ।
गर्मीको प्रभाव बढ्दै गएपछि फ्रान्स सरकारले सङ्कट व्यवस्थापन बैठक बोलाएको छ। देशभरका एक हजार ३५० भन्दा बढी विद्यालय बन्द गरिएका छन् भने जुन महिनाको औसत तापक्रम २९.२ डिग्री सेल्सियस पुगेर नयाँ रेकर्ड कायम भएको छ। ५४ वटा प्रशासनिक क्षेत्रमा ‘रेड अलर्ट’ जारी गरिएको छ, जसबाट करोडौँ नागरिक प्रभावित भएका छन्।
ऊर्जा क्षेत्रमा पनि असर देखिएको छ। दक्षिणपश्चिमी फ्रान्सको एक आणविक रिएक्टर चिसो पार्न प्रयोग हुने नदीको पानीको तापक्रम सुरक्षित सीमा नाघेपछि बन्द गरिएको छ।
बेल्जियममा मौसमविद्हरूले इतिहासकै उच्च तापक्रम नजिक पुग्ने चेतावनी दिएका छन्। केही विद्यालयले पठनपाठन समय छोट्याएका छन् भने नागरिकलाई आवश्यक सतर्कता अपनाउन आग्रह गरिएको छ।
जर्मनीमा गर्मीका कारण पौडी खेल्ने क्रममा हुने दुर्घटना बढेका छन्। सप्ताहन्तमा मात्रै पाँच जनाको मृत्यु भएको छ। फ्रान्कफर्ट विमानस्थलमा लामो समय विमानभित्र रोकिएका केही यात्रुहरूलाई स्वास्थ्य समस्या देखिएपछि उपचारसमेत गरिएको छ।
दक्षिणपूर्वी फ्रान्समा दुई र चार वर्ष उमेरका दुई बालबालिका कारभित्र मृत अवस्थामा फेला परेपछि अधिकारीहरूले अत्यधिक गर्मीको सम्भावित भूमिकाबारे अनुसन्धान गरिरहेका छन्।
यातायात क्षेत्रमा पनि चुनौती थपिएको छ। पेरिस क्षेत्रका अधिकारीहरूले अत्यधिक गर्मीका बेला अनावश्यक यात्रा नगर्न र सम्भव भएसम्म घरबाटै काम गर्न आग्रह गरेका छन्। रेल पूर्वाधारले ५० डिग्री सेल्सियससम्मको तापक्रम धान्न कठिन हुने चेतावनी पनि दिइएको छ।
बेलायतमा समेत उच्चस्तरको गर्मी चेतावनी जारी गरिएको छ। केही क्षेत्रमा तापक्रम ४० डिग्री सेल्सियससम्म पुग्ने अनुमान गरिएको छ भने मौसम विभागले जुन महिनाको तापक्रमसम्बन्धी पुराना रेकर्डहरू तोडिन सक्ने जनाएको छ।
सिफारिस
